Qarsda Azərbaycanın dövlət müstəqilliyinin bərpa edilməsinin ildönümü qeyd olunmuşdur (18 oktyabr 2011)
Ankara, 18 oktyabr (AzərTAc). Türkiyənin Qars şəhərində ölkəmizin baş
konsulluğunun təşkilatçılığı ilə Azərbaycanın dövlət müstəqilliyinin
bərpa edilməsinin 20-ci ildönümü münasibətilə mərasim keçirilmişdir.
Türkiyənin
və Azərbaycanın dövlət himnləri səsləndikdən sonra, ölkəmizin Qarsdakı
baş konsulu Ayxan Süleymanov xalqımızın müstəqillik yolunda keçdiyi
şərəfli yoldan, ümummilli lider Heydər Əliyevin banisi və xilaskarı
olduğu suveren respublikamızın əldə etdiyi nailiyyətlərdən, Prezident
İlham Əliyevin rəhbərliyi ilə Azərbaycandakı dinamik inkişafdan bəhs
etmişdir. Konsul vurğulamışdır ki, bu gün güclü iqtisadiyyata və yüksək
döyüş qabiliyyətinə malik olan dövlətimiz Ermənistanın işğal etdiyi
torpaqlarımızı hər an azad etməyə qadirdir. Qardaş Türkiyə bizi hər
zaman bu məsələdə dəstəkləyir.
Qars valisi Əhməd Kara möhtəşəm
bayram münasibətilə Azərbaycan xalqını təbrik etmişdir. O, ulu öndər
Heydər Əliyevin “Azərbaycanın müstəqilliyi əbədidir, sarsılmazdır”
kəlamını xatırladaraq bütün türk xalqının bunu arzu etdiyini
vurğulamışdır.
Mərasim Azərbaycan incəsənət ustalarının, Naxçıvan Dövlət Filarmoniyasının hazırladığı konsert proqramı ilə davam etmişdir.
Oqtay Bayramov
AzərTAc-ın xüsusi müxbiri
Ankara