Azərbaycanın dövlət müstəqilliyinin bərpa edilməsinin 20-ci ildönümü Pakistanda qeyd olunmuşdur (18 oktyabr 2011)
Azərbaycanın Pakistandakı səfirliyi İslamabadın “Marriott
mehmanxanasında” respublikamızın dövlət müstəqilliyinin bərpa
olunmasının 20-ci ildönümü münasibətilə təntənəli mərasim təşkil
etmişdir.
Mərasimdə Pakistanın federal naziri Riaz Pirzadə, Senatın
sədr müavini Mir Jan Məhammad Xan Camali və xüsusi katibi İftixar Babar,
Ticarət Sənaye Palatasının prezidenti İqbal Ahmad, Khayber-Paxtunxva
əyalətinin qubernatoru Səid Məsud Kosar, vitse-admiral Şah Sohail Məsud,
generallar Tanvir Nazim və Məhəmməd Vaqar, zabitlər, Milli
Assambleyanın deputatları, dövlət və hökumət rəsmiləri, tanınmış
ziyalılar, jurnalistlər, xarici ölkələrin Pakistanda akkreditə olunmuş
diplomatik korpusun nümayəndələri, həmyerlilərimiz iştirak etmişlər.
Ölkəmizin
Pakistandakı səfirliyindən AzərTAc-a bildirmişlər ki, mərasimin
keçirildiyi salon Azərbaycan bayraqları, ümummilli lider Heydər Əliyev
və Pakistan dövlətinin banisi Məhəmməd Əli Cinnahin, habelə Prezidentlər
İlham Əliyevin və Asif Əli Zərdarinin portretləri ilə bəzədilmişdir.
Salonda, həmçinin ölkəmizin gözəlliyini əks etdirən fotostendlər
yerləşdirilmiş, müstəqil Azərbaycanın yaranmasına və inkişafına dair
videoçarx nümayiş etdirilmiş, milli musiqi nümunələri səsləndirilmişdir.
Tanınmış siyasətçi R.Pirzadə qonaqlar adından respublikamızın
dövlət müstəqilliyinin bərpa edilməsinin 20-ci ildönümü münasibətilə
Azərbaycan xalqını təbrik etmiş, xoş arzularını bildirmişdir. Pakistanın
federal naziri vurğulamışdır ki, Azərbaycan ilə Pakistan arasında
dostluq və qardaşlıq münasibətləri mövcuddur.
Pakistanda ingilis və
ərəb dillərində nəşr olunan “The Diplomatic Insight” jurnalının, habelə
“Daily İttihad” qəzetinin dövlət müstəqilliyimizin bərpa edilməsinin
20-ci ildönümünə həsr edilmiş buraxılışları mərasim iştirakçılarına
paylanmışdır. Bu nəşrlərdə Azərbaycanın müstəqil dövlətçilik tarixi,
siyasəti, mədəniyyəti, turizm potensialı və iqtisadiyyatı, habelə
ümummilli lider Heydər Əliyevin dövlət müstəqilliyimizin
möhkəmləndirilməsində əvəzsiz xidmətlərindən, ulu öndərin siyasi
kursunun layiqli davamçısı Prezident İlham Əliyevin ölkəmizin inkişafı
naminə həyata keçirdiyi islahatlardan, Heydər Əliyev Fondunun prezidenti
Mehriban xanım Əliyevanın fəaliyyətindən geniş bəhs olunmuşdur.
Ölkənin
aparıcı ingilisdilli “Daily Times”, “Pakistan Observer” və urdudilli
“Daily Nawa-I-Waqt” və “Jang” qəzetlərində, habelə “Centreline”
jurnalında Azərbaycanın Pakistandakı səfirliyinin keçirdiyi tədbir geniş
işıqlandırılmış, Pakistanın dövlət televiziyasının PTV-1 və özəl
WAKT-TV kanalının xəbərlər proqramlarında mərasimlə bağlı süjetlər
nümayiş etdirilmişdir.
Bakı,
AzərTAc