Serbiyada Azərbaycanın dövlət müstəqilliyinin bərpasının iyirminci ildönümü qeyd edilmişdir (19 oktyabr 2011)
Bakı, 19 oktyabr (AzərTAc). Serbiyanın paytaxtı Belqradda Azərbaycanın
dövlət müstəqilliyinin bərpasının iyirminci ildönümünə həsr olunmuş
rəsmi qəbul keçirilmişdir.
Azərbaycanın Serbiyadakı səfirliyindən
AzərTAc-a bildirmişlər ki, tədbirdə Serbiya Respublikasının Prezidenti
Boris Tadiç, xarici işlər naziri Vuk Yeremiç, əmək və sosial siyasət
naziri Rasim Lyayiç, portfelsiz nazir Süleyman Uqlyanin, dövlət və
hökumət rəsmiləri, deputatlar, siyasi partiyaların rəhbərləri, xristian
və müsəlman din xadimləri, ictimai və qeyri-hökumət təşkilatlarının,
Belqradda akkreditə olunmuş diplomatik korpusun, Azərbaycan diasporunun
nümayəndələri, Serbiya-Azərbaycan Ticarət-İqtisadi Palatasının və Balkan
ölkələri üzrə Azərbaycan Mədəniyyət Mərkəzinin üzvləri iştirak
etmişlər.
Tədbirdə hər iki ölkənin dövlət himnləri səsləndirildikdən
sonra Azərbaycanın Serbiyadakı səfiri Eldar Həsənov çıxış edərək,
dövlət müstəqilliyi gününün tarixindən bəhs etmişdir. Bildirmişdir ki,
bu gün Azərbaycanın dövlətçilik tarixində ən parlaq və unudulmaz tarixi
günlərindən biridir və müstəqil Azərbaycan 1918-1920-ci illərdə müsəlman
Şərqində ilk dünyəvi, hüquqi və demokratik dövlət olan Azərbaycan
Demokratik Respublikasının hüquqi varisidir.
Diplomat dövlət
müstəqilliyimizin bərpasından sonra Azərbaycanın əldə etdiyi uğurlardan
danışmışdır. Vurğulamışdır ki, bu dövr ərzində Azərbaycanın müasir
tarixində müstəqil dövlətçiliyimizin möhkəmləndirilməsində xalqımızın
ümummilli lideri, görkəmli siyasi və dövlət xadimi Heydər Əliyevin
əvəzsiz rolu olmuşdur. Ulu öndərin milli mənafeyə söykənən siyasi kursu
və dövlət strategiyası bu gün Prezident İlham Əliyev tərəfindən uğurla
davam etdirilir.
E.Həsənov ölkəmizin əldə etdiyi uğurlarla yanaşı,
tarixi Azərbaycan torpaqlarının – Dağlıq Qarabağın və onun ətrafındakı
yeddi rayonun Ermənistanın işğalına məruz qalması kimi ağrılı
problemlərdən söz açmışdır. Qeyd etmişdir ki, Ermənistan-Azərbaycan,
Dağlıq Qarabağ münaqişəsi ilə bağlı BMT Təhlükəsizlik Şurasının qəbul
etdiyi dörd qətnaməyə hələ də məhəl qoyulmur.
Azərbaycan və Serbiya
arasında təşəkkül tapmış hərtərəfli əlaqələrə toxunan E.Həsənov
ikitərəfli münasibətlərin dinamik şəkildə, yüksələn xətlə inkişaf
etdiyini demişdir. Dövlət başçılarımızın qarşılıqlı səfərlərindən sonra
münasibətlərimiz yeni müstəviyə – strateji tərəfdaşlıq səviyyəsinə
yüksəlmişdir. Ölkələrimiz arasında əlaqələrin bu səviyyəyə yüksəlməsində
hər iki ölkə başçıları arasında mövcud olan səmimi, dost və mehriban
şəxsi münasibətlərin müstəsna rolu vardır. Azərbaycan və Serbiya
beynəlxalq miqyasda bir-birilərinin ərazi bütövlüklərini tanıyır,
sərhədlərinin toxunulmazlığını və suveren hüquqlarını qarşılıqlı olaraq
tam dəstəkləyirlər.
E.Həsənov Serbiya dövlətinə və hökumətinə
səfirliyin fəaliyyətinə göstərilən diqqət və qayğıya görə
minnətdarlığını bildirmişdir.
Serbiyanın xarici işlər naziri Vuk
Yeremiç Azərbaycan xalqını və dövlətini dövlət müstəqilliyimizin
bərpasının 20-ci ildönümü münasibətilə təbrik etmişdir. Bildirmişdir ki,
Serbiya dövləti və rəhbərliyi Azərbaycan ilə münasibətlərə müstəsna
önəm verir. Dövlət başçılarının qarşılıqlı səfərləri ölkələrimiz
arasında ikitərəfli və çoxtərəfli əməkdaşlığın dərinləşdirilməsinə zəmin
yaradır.
Nazir Azərbaycan ilə Serbiya arasında müxtəlif sahələrdə
əməkdaşlığın genişləndirilməsi və mümkün olduqca daha geniş sahələri
əhatə etmək üçün qarşılıqlı istəyin mövcudluğunu vurğulamış və
ölkələrimiz arasında əlaqələrin bundan sonra da yüksələn xətlə inkişaf
edəcəyinə əminliyini bildirmişdir.
Tədbirdə Azərbaycanın tarixini,
mədəniyyətini, gündəlik həyatını və müstəqilliyimizin bərpasından sonra
əldə edilmiş uğurları əks etdirən film nümayiş olunmuşdur.