Türkiyənin Amasya şəhərində Azərbaycanın dövlət müstəqilliyinin bərpasının 20 illiyinə həsr olunmuş “Ağsu möcüzəsi” sərgisi açılmışdır (19 oktyabr 2011)
Bakı, 19 oktyabr (AzərTAc). Türkiyənin Amasya şəhərində Azərbaycan
Respublikasının dövlət müstəqilliyinin bərpasının iyirminci ildönümünə
həsr olunmuş “Ağsu möcüzəsi” sərgisi açılmışdır.
AzərTAc xəbər verir
ki, MİRAS Mədəni İrsin Öyrənilməsinə Kömək İctimai Birliyinin və Amasya
Memarlar Odasının birgə təşkilatçılığı ilə Saraydüzü Qışlası Kültür
Mərkəzində keçirilən sərgidə İctimai Birliyin İdarə Heyətinin üzvləri,
tanınmış fotoqraf Məmməd Rəhimovun Ağsu arxeoloji ekspedisiyası
materiallarını özündə əks etdirən 84 fotopaneli, orta əsr Ağsu şəhərinin
konservasiya olunmasında yaxından iştirak edən, konservasiya müddətində
müşahidə etdiklərini kətana köçürən bərpaçı-rəssam Cahangir Əhmədovun
12 rəsm nümunəsi təqdim olunur.
Amasya valisi Abdilcelil Öz, Amasya
bələdiyyəsinin sədri Cafer Özdemir, Amasya Universitetinin rektoru,
professor Metin Orbay, Amasyalılar Dərnəyinin sədri, memar Hakkı Göztaş,
Amasya Memarlar odasının sədri Husamettin Seçilmiş, Azərbaycan Türkləri
Kültür, Sanat və Dayanışma Dərnəyinin sədri Muttalip Ulutanrıverdi və
Dairə müdirlərinin də iştirakı ilə keçirilən tədbiri MİRAS Mədəni İrsin
Öyrənilməsinə Kömək İctimai Birliyinin sədri, fəlsəfə doktoru Fariz
Xəlilli açaraq, “Azərbaycan Respublikasının müstəqilliyinin bərpasının
iyirminci ildönümü haqqında" Prezident İlham Əliyevin 21 yanvar 2011-ci
ildə verdiyi Sərəncamın əhəmiyyətini yüksək dəyərləndirmişdir.
F.Xəlilli
bildirmişdir ki, bu münasibətlə ölkəmizdə, eləcə də xaricdə diaspor
təşkilatları tərəfindən qeyd olunan tədbirlərdə Azərbaycanın müstəqillik
illərində müxtəlif sahələrdə qazandığı nailiyyətlərdən ətraflı söz
açılır. F.Xəlilli ölkəmizdə elm və təhsin inkişafına xüsusi dövlət
qayğısının olduğunu da diqqətə çatdırmışdır.
“Ağsu möcüzəsi”
sərgisinin Amasyadan başlanması səbəblərinə toxunan Fariz Xəlilli
bildirmişdir ki, Şirvan xanlığının baş şəhəri olan Ağsunun XIX əsrin
20-ci illərində ruslar tərəfindən ələ keçirilməsindən sonra yüzlərlə
ziyalı xanlığı tərk etmək məcburiyyətində qalmışdır. Belə ziyalılardan
biri Mövlanə İsmayıl Siracəddin Şirvani Şirvandan Amasyaya köçmüş,
burada yaşamış, dəfn edilmişdir. Onun ocağının başına Azərbaycanın hər
yerindən (Şirvan, Qarabağ, Qazax, Borçalı, İrəvan) yığışan insanlar
Amasyaya sığınaraq, şirvanlılar adı ilə tanınmışlar. Buna görə də Şirvan
xanlığının mərkəzindən aşkar olunan tapıntılara dair sərginin məhz
Türkiyə şirvanlılarının əsas şəhərində nümayiş olunması xüsusi məna
daşıyır.
Noyabrın 3-dək Amasyada, sonra isə Türkiyənin başqa
şəhərlərində göstərilməsi planlaşdırılan sərginin açılış lentini kəsən
vali Abdilcelil Öz Azərbaycanın müstəqilliyinin iyirminci ildönümünə
həsr olunmuş tədbirin Amasyada keçirilməsindən məmnunluq duyduğunu
bildirmişdir. Vurğulamışdır ki, Amasiya ilə şirvanlılar qırılmaz
tellərlə bir-birlərinə bağlıdırlar.
Ağsu şəhər bələdiyyəsi sədrinin
müavini Əlməhəmməd Usubəliyev Ağsuda aparılan arxeoloji qazıntılara
dövlətin diqqətindən və ictimai qayğıdan danışmışdır. Ağsu Rayon İcra
hakimiyyəti və şəhər bələdiyyəsi adından “Ağsu möcüzəsi” sərgisinin
təşkilinə göstərdiyi dəstəyə görə Amasya valisi və Amasiya bələdiyyəsinə
minnətdarlıq edən Ə.Usubəliyev gələcəkdə də belə tədbirlərin
keçirilməsini, Ağsu və Amasiyanın isə qardaş şəhərlər olmasını
arzulamışdır.
Tədbirdən əvvəl Amasya bələdiyyəsi sədrinin müavini
Osman Akbaşın rəhbərliyi ilə Amasya bələdiyyəsi konservatoriyasının
musiqi qrupu Türk təsəvvüf musiqisindən nümunələr, o cümlədən Seyid
Həmzə Nigarinin şeirlərinə bəstələnmiş musiqi parçaları səsləndirmişdir.
Tədbir çərçivəsində F.Xəlillinin və Mehmet Ruhtimin “Mövlanə
İsmayıl Siracəddin Şirvani və Qafqazlı müridlər” kitabının təqdimatı
olmuş, “Azərbaycandan Amasyaya Şirvanlılar” konfransı keçirilmişdir.
Konfransda
Cərrahpaşa Universitetinin professoru İbrahim Yıldırım, Azərbaycan
Qafqaz Universitetinin dosenti Mehmet Ruhtim və başqalarının mövzu ilə
bağlı məruzələri dinlənilmişdir.
Tədbirin sonunda Türk Dünyası
Mədəni İrsinin tədqiqində və təbliğində göstərdikləri dəstəyə görə
Cərrahpaşa Universitetinin professoru İbrahim Yıldırım, Qafqaz
Universitetinin dosenti Mehmet Ruhtim, Amasyalılar Dərnəyinin sədri,
memar Hakkı Göztaş və Amasya Memarlar Odasının sədri Husamettin
Seçilmişə MİRAS İctimai Birliyinin Dostu diplomları təqdim edilmişdir.
Həmin
gün ölkəmizin Türkiyədəki səfirliyi adından Azərbaycanın
müstəqilliyinin bərpasının iyirminci ildönümü münasibətilə keçirilən
tədbirin iştirakçılarına ziyafət verilmişdir.