Varşavada Azərbaycan Respublikasının dövlət müstəqilliyinin bərpasının iyirminci ildönümü qeyd olunmuşdur (19 oktyabr 2011)
Bakı, 19 oktyabr (AzərTAc). Varşavada Azərbaycan Respublikasının dövlət
müstəqilliyinin bərpasının iyirminci ildönümünə həsr olunmuş bayram
tədbiri keçirilmişdir.
Azərbaycanın Polşadakı səfirliyindən
AzərTAc-a bildirmişlər ki, səfir Həsən Həsənov çıxış edərək Azərbaycanın
son 20 ildə keçdiyi inkişaf yolu, müstəqilliyimizin ilk illərində
ölkədə gedən siyasi proseslər, hərc-mərclik, vətəndaş müharibəsi və
ümumiyyətlə, respublikanın parçalanma təhlükəsi ilə üz-üzə qalması
barədə məlumat vermişdir. Bildirilmişdir ki, 1993-ci ildə ümummilli
lider Heydər Əliyevin xalqın tələbi ilə yenidən hakimiyyətə qayıdışı
ölkədəki vəziyyətin köklü şəkildə dəyişməsinə, respublikanın sabit
həyata qovuşmasına, iqtisadiyyatın tədricən dirçəlməsinə və inkişafına
səbəb olmuşdur.
Qeyd edilmişdir ki, Prezident İlham Əliyev
tərəfindən aparılan ardıcıl və məqsədyönlü daxili və xarici siyasət
ölkəmizin və onun müstəqilliyinin daha da möhkəmlənməsinə xidmət edir.
Azərbaycanın dünya ölkələri arasında layiqli yer tutması, söz sahibi
olması və regionun lider ölkəsinə çevrilməsi də aparılan siyasətin
məntiqi nəticəsidir.
Sonra Azərbaycan icması tərəfindən təsis
edilmiş “Azərbaycan” jurnalının təqdimatı olmuşdur. Jurnalın təsisçisi
və baş redaktoru Şövqi Vaqifoğlu nəşr barədə ətraflı məlumat vermişdir.
Tədbirdə,
həmçinin “Birlik” Cəmiyyətinin sədri Nəbi İbadov və “Azərbaycan-Polşa”
Cəmiyyətinin sədri Rövşən Rzayev çıxış etmişlər.
Dövlətimizin
müstəqilliyinin bərpasının iyirminci ildönümü ilə əlaqədar Polşa
Müstəqillik Muzeyində şəhər ictimaiyyəti ilə görüş keçirilmiş,
səfirliyin nəzdində Azərbaycan dili kursları açılmışdır.