Moskva Dövlət Linqvistika Universitetində Azərbaycanın dövlət müstəqilliyinin bərpasının 20-ci ildönümünə həsr olunan tədbir keçirilib (20 oktyabr 2011)
Moskva Dövlət Linqvistika Universitetində Azərbaycanın dövlət
müstəqilliyinin bərpasının 20 illiyinə həsr olunmuş tədbir keçirilib.
APA-nın Moskva müxbirinin verdiyi məlumata görə, universitetin
Azərbaycan dili və Mədəniyyəti Mərkəzində keçirilən tədbirdə
universitetin prorektorları, dekanları, müəllim və tələbələri iştirak
ediblər. Tədbirdə çıxış edən mərkəzin rəhbəri, Bakı Slavyan
Universitetinin professoru Bella Musayeva 1991-ci il oktyabrın 18-də
Azərbaycan müstəqilliyini bərpa etdiyi gündən ötən 20 il ərzində
ölkəmizin sürətli inkişaf yolu keçdiyini bildirib. Onun sözlərinə görə,
Azərbaycan dövlətinin qarşısında duran əsas problem Ermənistanın işğalı
altında olan ərazilərin azad edilməsidir.
Universitetin Azərbaycan
dilini öyrənən tələbələri 18 oktyabr - Müstəqillik Günü ilə bağlı
Azərbaycan dilində çıxış ediblər. Həmin tələbələrin hazırladığı “Biz
səni sevirik Azərbaycan” adlı film nümayiş olunub. Filmdə Moskva Dövlət
Linqvistika Universitetinin tələbələrinin Azərbaycana səfərindən və
universitetdə Azərbaycanla bağlı keçirdiyi tədbirlərdən süjetlər,
həmçinin Azərbaycan dili dərsinin keçirilməsi prosesinə yer alıb.
Bundan
başqa, mərkəz tərəfindən universitetin foyesində Azərbaycanın
müstəqilliyinin bərpasının 20 illiyinə həsr olunmuş fotosərgi də təşkil
olunub.
Moskva
APA