Argentinada Azərbaycanın müstəqilliyinin bərpasının 20 illiyinə həsr olunan konfrans keçirilib (23 noyabr 2011)
Buenos-Ayresdə Azərbaycanın dövlət müstəqilliyinin bərpasının 20-ci
ildönümünün qeyd edilməsi ilə əlaqədar keçirilən akademik, ictimai və
mədəni tədbirlər həftəsi çərçivəsində Latın Amerikasının xarici siyasət
üzrə aparıcı beyin mərkəzlərindən biri olan Argentina Beynəlxalq
Əlaqələr Şurasında (CARI) “Azərbaycan: müstəqilliyin bərpasından keçən
20 il ərzində” adlı konfrans təşkil edilib. Bu barədə Trend-ə
Azərbaycanın Argentinadakı səfirliyindən məlumat verilib.
İki
paneldən ibarət bu konfransın birinci hissəsi “Azərbaycan
Respublikasının xarici siyasəti: prioritetlər və çağırışlar”, ikinci
hissəsi isə “Azərbaycan və Argentina: potensial tərəfdaşlar” mövzularına
həsr olunub.
Konfransda Azərbaycanının inkişaf strategiyası,
ölkəmizin müstəqillik dövründə qarşılaşdığı problemlər və əldə etdiyi
uğurlar, Ermənistanın Azərbaycana qarşı təcavüzkar siyasəti və
münaqişənin nizamlanması prosesi, Azərbaycanın enerji strategiyası və
Qərb-Şərq enerji-infrastruktur dəhlizinin inkişafındakı rolu, habelə son
dövrdə inkişaf etməkdə olan Azərbaycan-Argentina münasibəltəri, siyasi,
iqtisadi, xüsusilə də kənd təsərrüfatı və texnologiyalar sahəsində
əməkdaşlıq, parlamentlərarası əlaqələr mövzularında çıxışlar edilib və
geniş fikir mübadiləsi aparılıb.
Konfrans Azərbaycanın Argentinadakı
elmi-akademik dairələrində təşviqi və ölkəmizin reallıqları barədə
məlumatların Argentina ictimaiyyətinə çatdırılması baxımından böyük
əhəmiyyətə malik olub.
Konfransda Argentinanın hökumət
strukturlarının, qanunvericilik orqanının, elmi-akademik dairələrinin
nümayəndələri, xarici siyasət və diplomatiya üzrə ekspertləri,
diplomatik korpusun təmsilçiləri iştirak ediblər.
Konfransın ardınca
CARI-nin İdarə Heyətinin üzvləri ilə Azərbaycan nümayəndə heyəti
arasında əlavə görüş keçirilib, görüşdə konfransda müzakirə olunan
mövzuların müzakirəsi davam etdirilib, xüsusilə də Azərbaycan-Argentina
əməkdaşlığının Xəzər hövzəsi-Merkosur regionlarının bir-birinə
yaxınlaşdırılması üçün mühüm amil ola biləcəyi qeyd edilərək bu
istiqamətdə SAM və CARİ tərəfindən birgə əməkdaşlıq proqramlarının
həyata keçirilməsi razılaşdırılıb.
Milli.Az