Bakıda “Müstəqilliyin 20 illiyi: mütərəqqi, ədalətli və dinamik dövlət quruculuğuna gedən yolda əldə olunmuş nailiyyətlər və qarşıya çıxan çətinliklər” mövzusunda beynəlxalq konfrans keçirilmişdir (7 dekabr 2011)
Bakı, 7 dekabr (AzərTAc). Dekabrın 7-də Bakıda Azərbaycan
Respublikası Prezidenti yanında Strateji Araşdırmalar Mərkəzi (SAM) və
BMT-nin İnkişaf Proqramının (UNDP) birgə təşkilatçılığı ilə
“Müstəqilliyin 20 illiyi: mütərəqqi, ədalətli və dinamik dövlət
quruculuğuna gedən yolda əldə olunmuş nailiyyətlər və qarşıya çıxan
çətinliklər” mövzusunda beynəlxalq konfrans keçirilmişdir.
AzərTAc
xəbər verir ki, konfransın əsas məqsədi Azərbaycanın dövlət
müstəqilliyinin bərpa olunmasından sonra qazanılmış nailiyyətlərə,
ölkədə həyata keçirilən sosial-siyasi, iqtisadi və mədəni islahatlara
nəzər salmaq, gələcək inkişaf prioritetlərini müəyyənləşdirmək olmuşdur.
Tədbirdə dövlət və hökumət rəsmiləri, ölkəmizdə akkreditə olunmuş
diplomatik korpusun və beynəlxalq təşkilatların nümayəndələri, Milli
Məclisin deputatları, elm və təhsil müəssisələrinin, vətəndaş
cəmiyyətinin təmsilçiləri, yerli və beynəlxalq ekspertlər, jurnalistlər
iştirak etmişlər.
Konfransı açan SAM-ın direktor müavini Gülşən
Paşayeva ötən 20 ilin nailiyyətləri ilə yanaşı, gələcək onillikdə
qarşıda duran çağırışlara cavablar ətrafında müzakirələrin aparılması
baxımından tədbirin əhəmiyyətini vurğulamışdır.
G.Paşayeva
bildirmişdir ki, Prezident İlham Əliyevin bu ilin əvvəlində imzaladığı
“Azərbaycan Respublikasının dövlət müstəqilliyinin bərpasının 20-ci
ildönümü haqqında” Sərəncamına əsasən, ölkəmizin inkişafının müxtəlif
sahələrində əldə edilən nailiyyətlər bir çox yerli və beynəlxalq
tədbirlərdə geniş müzakirə olunmuşdur. Aparılan müzakirələrin yekunu
göstərir ki, Azərbaycanın mütərəqqi inkişaf modelinin reallaşması
istiqamətində bu illər ərzində zəngin təcrübə əldə edilmişdir.
Azərbaycan Respublikası Prezidenti Administrasiyasının rəhbəri, akademik Ramiz MEHDİYEV konfransda giriş nitqi söyləmişdir.
Dövlət müstəqilliyinin bərpa edilməsindən ötən 20 ildə Azərbaycanda
köklü islahatlar aparıldığını, iqtisadi münasibətlərin yeni əsaslar
üzərində qurulması istiqamətində böyük işlər görüldüyünü vurğulayan
Ramiz Mehdiyev demişdir: “Bu gün biz Azərbaycanın yeni inkişaf
strategiyasını hazırlayıb, beynəlxalq rəqabətədavamlılığı təmin etmək
üçün innovativ yollara qədəm qoyuruq. Prezident İlham Əliyevin
imzaladığı “Azərbaycan 2020: gələcəyə baxış” İnkişaf Konsepsiyası məhz
bu çağırışları aradan qaldırmaq məqsədi daşıyır. Artıq demək olar ki,
biz inkişaf strategiyasının mahiyyətcə yeni mərhələsinin əvvəlindəyik.
Bu, əlbəttə, son iyirmi ildə əldə etdiyimiz nailiyyətlərin nəticəsi və
məntiqi davamıdır. Lakin onu da qeyd etmək lazımdır ki, bu yolda
əngəllər və maneələr az deyildi. Tarixən geosiyasi maraqların toqquşduğu
məkanda yerləşən Azərbaycan müstəqilliyini qoruyub saxlamaq və
taleyinə, gələcəyinə sahib çıxmaq üçün hər zaman mübarizə aparmışdır.
Bu, Sovetlər Birliyi dağıldıqdan sonra da belə oldu. Azərbaycan xalqı
çətin, lakin şərəfli bir yolun başlanğıcına qədəm qoydu. Dünyanın güc
dövlətlərinin geosiyasi mübarizəsi fonunda qonşu Ermənistanın hərbi
təcavüzü, iqtisadi tənəzzül, inflyasiya, siyasi hərc-mərclik 1990-cı
illərin əvvəlində Azərbaycan dövlətinin gələcəyi haqqında ciddi suallar
doğurmuşdu. Belə vəziyyətdə geniş iqtisadi və intellektual potensiala,
təbii enerji sərvətlərinə baxmayaraq, xalqımızın güzəranı, həyat tərzi
dözülməz həddə çatmış, insanların gələcəyə inamı tamamilə itmişdi”.
Ümummilli
lider Heydər Əliyevin 1993-cü ilin iyununda hakimiyyətə qayıdışının
müasir Azərbaycan tarixində yeni bir eranın başlanğıcının rəmzinə
çevrildiyini diqqətə çatdıran akademik Ramiz Mehdiyev demişdir ki, ulu
öndər bütün sağlam qüvvələri, dövlətçilik düşüncəsi ilə yaşayan
insanları öz ətrafında birləşdirərək, Azərbaycanı bu çətin durumdan
xilas etmiş, yeni inkişaf strategiyasının əsasını qoymuşdur.
Akademik
Ramiz Mehdiyev demişdir ki, dövlətimizin iqtisadi qüdrəti son iyirmi
ildə dəfələrlə artmış və Azərbaycan regional iqtisadi inkişafın əsas
aparıcı vektoruna çevrilərək, Cənubi Qafqaz ölkələrinin iqtisadiyyatının
80 faizindən çoxunu təşkil edir. Ölkə daxilində həyata keçirilən
iqtisadi islahatlar, o cümlədən özəlləşmə və liberallaşma bazar
münasibətlərinin formalaşmasını və qısa zaman axarında Azərbaycanın
keçid dövrünü uğurla başa vurmasını şərtləndirmişdir.
Azərbaycan
dövlətinin inkişaf strategiyasının əsas qayəsini insan amilinin təşkil
etdiyini vurğulayan məruzəçi bildirmişdir ki, Prezident İlham Əliyev
tərəfindən prioritet kimi təyin edilən “qara qızılın insan kapitalına
çevrilməsi” çağırışı bizim bu problemə nə qədər həssas yanaşmağımızı bir
daha göstərir. Biz çox gözəl dərk edirik ki, insan amilinin inkişafına
dövlət qayğısı təhlükəsiz gələcəyimizin təminatçısıdır.
Azərbaycanın
iqtisadi modelinin “özəl” və “sosial” arasında vəhdətin tapılmasına və
dövlətin zəruri müdaxilə rolunun yenidən dəyərləndirilməsinə
əsaslandığını söyləyən Prezident Administrasiyasının rəhbəri Ramiz
Mehdiyev demişdir ki, Azərbaycan dövlətinin sosialyönümlü müdaxiləsi
“rifah dövlətinin” yaradılması istiqamətində məqsədyönlü fəaliyyətin
bariz nümunəsidir. Əhalinin həyat səviyyəsinin yaxşılaşdırılması, işlə
təmin edilməsi, yoxsulluğun azaldılması son iyirmi ildə həyata keçirilən
sosial-iqtisadi siyasətin əsas prioritetləri olmuşdur.
Müstəqillik
dövrünün mühüm səciyyəvi xüsusiyyətinin iqtisadi və siyasi islahatların
paralel şəkildə aparılması olduğunu vurğulayan akademik Ramiz Mehdiyev
bildirmişdir: “Əgər 1993-cü ildən başlayaraq sabitliyin bərqərar
edilməsi iqtisadi fəaliyyət, bazar iqtisadiyyatı institutlarının
formalaşması, xarici sərmayədarların iqtisadiyyatın müxtəlif sahələrinə,
xüsusilə neft sahəsinə investisiya yatırması ilə müşahidə olunurdusa,
iqtisadi artımın və inkişafın davamlı xarakter alması siyasi
islahatların uğurla həyata keçirilməsini, əhalinin siyasi səhnədə fəal
iştirakını və Azərbaycanın Avropa təsisatlarına inteqrasiyasını
şərtləndirmişdir.
Bərabərlik və azadlıq o cəmiyyətdə mümkün olur ki,
orada möhkəm iqtisadi bazis və siyasi iradə olsun. Bu iki amil bu gün
Azərbaycanda demokratik təsisatların köklü şəkildə oturuşmasına və
demokratik çərçivənin siyasi fəaliyyətin əsas tənzimləyici funksiyasını
yerinə yetirməsinə səbəb olmuşdur. Azərbaycan artıq 2001-ci ildən Avropa
Şurasına daxil olmaqla Avropa demokratiya ailəsinin fəal bir üzvünə
çevrilmişdir.
Eyni zamanda, regional geosiyasi mühitin
xüsusiyyətlərini nəzərə alan çoxşaxəli xarici siyasət kursu Azərbaycanın
beynəlxalq arenada fəaliyyət imkanlarını genişləndirdi və region
dövlətləri ilə münasibətlərdə yeni əməkdaşlıq perspektivləri açdı. Təyin
edilən prioritetlər, ilk növbədə Azərbaycanın malik olduğu mövcud
resursların yenidən dəyərləndirilməsini və onların ən optimal
istifadəsinin təşkil edilməsini tələb edirdi. Bu, qədim dövlətçilik
ənənəsinə malik olan Azərbaycanın güclü regional aktora çevrilməsini,
onun Avropa təsisatlarına, dünya birliyinə uğurlu inteqrasiyasını və
bütün uzaq-yaxın tərəfdaşlarla bərabər hüquqlar və qarşılıqlı prinsiplər
əsasında əməkdaşlığın inkişaf etdirilməsini şərtləndirdi. Eyni zamanda,
apardığımız siyasət bizə beynəlxalq təhlükəsizlik və sülhün
qorunmasında, qlobal təhlükəsizlik məsələlərinin həllində yeni
məsuliyyət və öhdəliklər verir. Azərbaycanın oktyabrın 24-də BMT
Təhlükəsizlik Şurasına qeyri-daimi üzv seçilməsi məhz dövlət başçısının
ağıllı və uzaqgörən siyasi fəaliyyətinin məntiqi nəticəsidir”.
Ermənistanın Azərbaycana hərbi təcavüzünün, torpaqlarımızın bir
hissəsini 19 ildir ki, işğal altında saxlamasının beynəlxalq hüququn
norma və prinsiplərinə zidd olduğunu vurğulayan Ramiz Mehdiyev demişdir
ki, belə qeyri-hüquqi vəziyyətin yaranmasına baxmayaraq, biz beynəlxalq
birliyin süstlüyünü müşahidə edirik. Minsk qrupuna daxil olan ölkələrin
Dağlıq Qarabağ probleminin həllindəki fəaliyyətini heç də qənaətbəxş
hesab etmək olmaz. Dünya ictimaiyyətinin gözü qarşısında bu dövlətlər
uzun illərdir Ermənistanın təcavüzünə son qoyulması, Azərbaycanın
torpaqlarının işğalçılardan azad edilməsi üçün əllərini ağdan-qaraya
vurmayıblar. Azərbaycan xalqı çoxdandır özü üçün aydın edibdir ki,
erməni işğalçıları pərdə arxasında müdafiə olunur. Minsk qrupu
dövlətləri bilməlidirlər ki, Azərbaycan xalqının dözümünün hüdudları elə
də geniş deyil, onun səbir kasası artıq dolubdur. Dağlıq Qarabağdakı
mövcud vəziyyət millətlərin qurmaq istədiyi gələcək ədalətli cəmiyyət,
sülh və təhlükəsizlik üçün əsas təhdid mənbəyi olaraq qalır. Beynəlxalq
birlik səylərini artırmalı, beynəlxalq qanunun aliliyini rəhbər tutmalı
və Ermənistanı beynəlxalq öhdəliklərini yerinə yetirməyə vadar
etməlidir.
Daha sonra akademik Ramiz Mehdiyev qeyd etmişdir ki,
Dağlıq Qarabağda yaşayan insanlar Azərbaycan vətəndaşlarıdır. Avropa
Şurasında öz mütərəqqi mövqeyi ilə tanınan Azərbaycan vahid və universal
dəyərlər, ideyalar ətrafında milli birliyin qorunmasını təmin etməklə
yanaşı, özünə aid xüsusiyyətləri ilə fərqlənən azlıqların hüquqlarını
tanıyır. Dağlıq Qarabağda doğulub və yaşayan ermənilər Azərbaycanın
Avropa Şurası və BMT qarşısında üzərinə götürdüyü öhdəliklərə uyğun
olaraq və Azərbaycan qanunvericiliyi çərçivəsində azad şəkildə fəaliyyət
göstərib, Azərbaycan Konstitusiyasının verdiyi hüquqlardan istifadə edə
bilərlər.
Lakin təcavüz və əməkdaşlıq bir araya sığmır.
Ermənistanın işğalçı siyasəti, onun regional layihələrdən özünü təcrid
etməsi bu ölkənin iqtisadiyyatını çətin vəziyyətə salmışdır.
Məhrumiyyətlər qarşısında qalan Ermənistan əhalisi kütləvi şəkildə
ölkəni tərk edir. Azərbaycanda isə 1994-cü ildən həyata keçirilən
iqtisadi strategiya bu gün də uğurla davam etdirilir. “Əsrin
müqaviləsi”nin imzalanması Azərbaycanın dünya iqtisadiyyatına
inteqrasiyasını sürətləndirmiş, onun geosiyasi əhəmiyyətini ön plana
çıxarmışdır. Bu, uzaqgörən və praqmatik siyasətin nəticəsidir.
Konfransın
işinə uğurlar arzulayan Prezident Administrasiyasının rəhbəri Ramiz
Mehdiyev nitqini aşağıdakı fikirlərlə yekunlaşdırmışdır: “Yeni qaz
yataqlarının kəşf edilməsi Azərbaycanın ixrac potensialını artırmış, onu
dünyanın əsas qaz hasilatçıları sırasına yüksəltmişdir. Azərbaycan
artıq Avropanın əsas enerji tərəfdaşına çevrilmişdir. Eyni zamanda,
regionda həyata keçirilən enerji layihələri, o cümlədən neft və qaz
kəmərləri, Bakı-Tbilisi-Qars dəmir yolu xətti regional əməkdaşlığa da
xüsusi töhfə vermişdir. Bu gün Azərbaycan Cənubi Qafqazda lider dövlət
olaraq, regional əməkdaşlığın əsas aparıcı qüvvəsinə çevrilmişdir. Bu
isə Azərbaycanda səmərəli dövlətçiliyin, güclü iqtisadiyyatın və milli
birliyin bariz nümunəsidir”.
* * *
Azərbaycanın 20 illik müstəqilliyi dövründə əldə etdiyi nailiyyətləri
vurğulayan BMT-nin İnkişaf Proqramının Azərbaycandakı ofisinin
rezident-nümayəndəsi Fikrət AKÇURA respublikamızın BMT Təhlükəsizlik
Şurasının qeyri-daimi üzvü seçilməsinin bunun nəticəsi olduğunu
demişdir.
BMT rəsmisi qeyd etmişdir ki, ötən 20 ildə keçmiş sovet
respublikaları arasında yalnız Azərbaycan ən yüksək iqtisadi
göstəricilərə nail olmuşdur. Müstəqilliyinin ilk illərində Azərbaycan
üzləşdiyi siyasi, iqtisadi və sosial çətinlikləri dəf edərək çox mühüm
inkişafa nail olmuş, müstəqilliyini möhkəmləndirmiş, işsizliyin,
yoxsulluğun səviyyəsini azaltmış, insan hüquqlarının qorunması sahəsində
yaxşı nəticələr əldə etmişdir. Yoxsulluğun səviyyəsinin 49 faizdən 9
faizədək azaldılması Azərbaycanın ən böyük uğurudur.
Fikrət Akçura
demişdir ki, Azərbaycan dövləti mühüm addımlar ataraq, ölkənin ərzaq və
enerji təhlükəsizliyinin təmin olunması istiqamətində əhəmiyyətli
tədbirlər həyata keçirmişdir. Gender bərabərliyi, o cümlədən qadınların
təhsil alması, onların işlə təmin edilməsi sahəsində Azərbaycanda heç
zaman problem olmamışdır.
Azərbaycanın siyasi, iqtisadi, sosial və
s. sahələrdə sürətli inkişafına ən böyük maneə kimi
Ermənistan-Azərbaycan, Dağlıq Qarabağ münaqişəsinə diqqəti cəlb edən
F.Akçura beynəlxalq təşkilatların ciddi səylərinə baxmayaraq problemin
hələ də həll olunmadığını vurğulamışdır.
Natiq BMT-nin İnkişaf
Proqramının dəstəyi ilə ölkəmizdə 2020-ci ilədək həyata keçiriləcək bir
sıra layihələrin Azərbaycanda qeyri-neft sektorunun inkişafı, yaşayış
standartları və əhalinin işlə təmin olunmasında regional fərqlərin
aradan qaldırılması, iqtisadiyyatın bütün sahələrinin işçi qüvvəsi ilə
təmin olunması, zəif qrupların dəstəklənməsi imkanlarını artıracağını
demişdir.
Bildirilmişdir ki, Azərbaycan son illərdə
informasiya-kommunikasiya texnologiyaları sahəsində əldə etdiyi bilik və
bacarığını iqtisadiyyatda tətbiq etməklə daha sürətli inkişafa nail
olmuşdur. Xüsusilə, bu sahədə fəaliyyət göstərən xarici şirkətlərin
Azərbaycana cəlb edilməsi informasiya-kommunikasiya texnologiyaları
sektorunun və bütövlükdə iqtisadiyyatın inkişafına mühüm təkan
vermişdir.
Respublikamızda 5 yaşadək uşaqlar arasında ölüm
hallarının azalmasının əhəmiyyətini qeyd edən və səhiyyə sahəsinə
kifayət qədər vəsaitin ayrıldığını vurğulayan F.Akçura BMT-nin İnkişaf
Proqramının Azərbaycanın ən yaxın tərəfdaşlarından olduğunu bildirmiş,
qurumun ölkəmizin gələcək inkişafı üçün yardımını əsirgəməyəcəyini
demişdir.
* * *
Sonra konfrans işini bölmə iclaslarında davam etdirmişdir.
“İyirmi
illiyin nailiyyətləri” adlı birinci bölmə iclasında “İqtisadi artım və
yoxsulluğun azaldılması” mövzusunda məruzə ilə çıxış edən iqtisadi
inkişaf naziri Şahin MUSTAFAYEV bildirmişdir ki, ulu öndər Heydər
Əliyevin inkişaf strategiyası bu gün Prezident İlham Əliyev tərəfindən
uğurla davam etdirilir.
Nazir 2003-cü illə müqayisədə 2010-cu ildə
ölkəmizdə ümumi daxili məhsulun üç dəfə artdığını diqqətə çatdırmışdır.
Bildirmişdir ki, bu illər ərzində əhalinin gəlirləri də artmış, yaşayış
səviyyəsinin yaxşılaşdırılması istiqamətində mühüm işlər görülmüş, bir
milyona yaxın iş yeri yaradılmışdır.
Hazırda Azərbaycanın valyuta
ehtiyatlarının 40 milyard dollardan artıq olduğunu deyən nazir bütün bu
nailiyyətlərin dünya birliyi tərəfindən də yüksək qiymətləndirildiyini
vurğulamışdır.
Azərbaycanda qeyri-neft sektorunun inkişafından
danışan Ş.Mustafayev aqrar, nəqliyyat, informasiya və kommunikasiya
sahələrində mühüm uğurların qazanıldığını qeyd etmişdir. Bildirilmişdir
ki, Azərbaycan yuxarı orta gəlirli ölkələr siyahısına daxil olmuşdur.
Nazir,
həmçinin təhsil, səhiyyə, sosial və ekologiya sahələrində görülən
işlərdə Heydər Əliyev Fondunun xidmətlərini xüsusi vurğulamışdır.
“Davamlı
inkişaf üçün nəqliyyat infrastrukturunun təkmilləşdirilməsi” mövzusunda
məruzə ilə çıxış edən Asiya İnkişaf Bankının ölkəmizdəki daimi
nümayəndəliyinin rəhbəri Olli NOROYONO Azərbaycanda yolların, xüsusilə
də kənd yollarının çəkilişində böyük irəliləyişlərin əldə olunduğunu
qeyd etmişdir.
Azərbaycanın nəqliyyat strukturunun regionun onurğa
sütununa çevrildiyini deyən O.Noroyono ölkəmizin Avropa ilə Asiya
arasında vacib körpü rolunu oynadığını diqqətə çatdırmışdır.
“Quruculuq naminə resursların istifadəsi” mövzusunda məruzə ilə çıxış
edən Dövlət Neft Fondunun icraçı direktoru Şahmar MÖVSÜMOV əsası
ümummilli lider Heydər Əliyev tərəfindən qoyulmuş, hazırda Prezident
İlham Əliyevin uğurla davam etdirdiyi neft strategiyasının
əhəmiyyətindən danışmışdır. Qeyd edilmişdir ki, neft gəlirlərinin
toplanması və şəffaf istifadəsi məqsədilə 1999-cu ildə yaradılan Dövlət
Neft Fonduna 2001-2011-ci illərdə 63,5 milyard dollar vəsait daxil
olmuşdur. Qaçqın və məcburi köçkünlərin həyat şəraitinin
yaxşılaşdırılmasına böyük məbləğdə vəsait sərf edən Fond
Bakı-Tbilisi-Ceyhan neft boru kəməri, Bakı-Tbilisi-Qars dəmir yolu,
Qğuz-Qəbələ-Bakı su kəməri, Samur-Abşeron suvarma sisteminin yenidən
qurulması və digər mühüm layihələrin maliyyələşdirilməsində fəal iştirak
etmişdir.
Konfransın “Gələcək onilliyin məqsədləri” adlı ikinci
sessiyasında “Mütərəqqi, ədalətli və dinamik dövlət quruculuğunun
növbəti addımları” mövzusunda məruzə ilə çıxış edən Prezident
Administrasiyasının siyasi təhlil və informasiya təminatı şöbəsinin
müdiri Elnur ASLANOV bildirmişdir ki, ölkəmiz artıq inkişafın mühüm
mərhələsinə çatmışdır və hazırda yeni perspektivlər üzərində iş
aparılır. Azərbaycan demokratik əsaslar üzərində inkişafını təmin
etməklə yanaşı, yeni yazılan tarixin səhifələrində öz dəst-xəttini qeyd
edir. Bu, bizim dinamik və mütərəqqi dövlət quruculuğumuzun əsas
səciyyəvi cəhətidir. Dövlət və cəmiyyət arasında inam və etibar
Azərbaycanın möhkəm təməllər üzərində gələcək inkişafının əsas
amilləridir.
Şöbə müdiri bildirmişdir ki, Azərbaycan tarixinin
mahiyyətindən irəli gələn səciyyəvi cəhətlərin nəzərə alınması yeni
inkişaf strategiyasının uğurla həyata keçirilməsini və gələcək
çağırışların aradan qaldırılmasını şərtləndirir.
Azərbaycanın həm
Avropa, həm də Asiya dövlətləri ilə əlaqələrini inkişaf etdirdiyini
söyləyən Elnur Aslanov demişdir ki, “Şərq tərəfdaşlığı” proqramının fəal
iştirakçısı olmaqla, ölkəmiz Aİ-nin etibarlı enerji tərəfdaşıdır.
Şöbə müdiri, həmçinin yeni yaradıcı və intellektual təbəqənin
formalaşmasının əsas zəmini kimi “Azərbaycan gəncliyi 2011-2015-ci
illərdə” Dövlət Proqramının əhəmiyyəti haqqında danışmışdır.
Sonra
rabitə və informasiya texnologiyaları nazirinin müavini Elmir VƏLİZADƏ
“Biliklərə əsaslanan dövlət quruculuğu” mövzusunda məruzə ilə çıxış
etmişdir.
Ölkəmizdə informasiya-kommunikasiya texnologiyaları
sahəsində inkişafın əsas istiqamətlərindən danışan E.Vəlizadə
bildirmişdir ki, 2000-ci ildə BMT-nin Minilliyin sammitinin qərar və
tövsiyələrindən irəli gələrək Azərbaycan informasiya cəmiyyətinə keçidi
başlıca hədəf kimi müəyyənləşdirən Milli Strategiyanı işləyib hazırlayan
ilk dövlətlərdən biri olmuşdur.
Nazir müavini qeyd etmişdir ki, son
altı ildə Azərbaycanda İKT-nin həcmi 6 dəfə artmış, orta illik artım
tempi 25-30 faiz təşkil etmişdir. Elektron xidmətlərin göstərilməsi üçün
“bir pəncərə” prinsipi əsasında “elektron hökumət” portalı
yaradılmaqdadır. Bütün bunlar müstəqilliyimizin töhfələridir.
Ailə,
Qadın və Uşaq Problemləri üzrə Dövlət Komitəsinin sədri Hicran HÜSEYNOVA
“Qadınların cəmiyyətdə və iqtisadiyyatda bərabər tərəfdaşlığı”
mövzusunda məruzə ilə çıxış etmişdir. Komitə sədri bildirmişdir ki,
Azərbaycanda aparılan uğurlu gender siyasətinin nəticəsində qadınların
öz potensialını reallaşdırmaları, ictimai-siyasi həyatda daha fəal
olmaları üçün geniş zəmin yaranmışdır. Müasir Azərbaycanda qadınların
hakimiyyət orqanlarında iştirakı getdikcə daha da artır. Təsadüfi
deyildir ki, parlamentdə qadın deputatların təmsilçiliyi ötən çağırışla
müqayisədə 14 nəfərdən 20 nəfərə qədər yüksəlmiş, bələdiyyə orqanlarında
qadınların təmsilçiliyi 4 faizdən 26,5 faizə çatmışdır.
H.Hüseynova demişdir ki, Azərbaycanda qadın siyasətinin uğurları beynəlxalq müstəvidə də çox yüksək qiymətləndirilir.
“Növbəti
nəslin profili - gənclər Azərbaycanın gələcəyi üçün” mövzusunda məruzə
ilə çıxış edən gənclər və idman naziri Azad RƏHİMOV son 20 ildə gənclər
təşkilatlarının ictimai-siyasi fəaliyyətdə əldə etdiyi uğurlardan
danışmışdır.
Gənclərimizin bir sıra beynəlxalq tədbirlərdə fəal
iştirak etdiyini vurğulayan nazir idman sahəsində də əldə olunan
müvəffəqiyyətlərdən bəhs etmişdir.
Azərbaycanın idman ölkəsinə
çevrildiyini deyən nazir beynəlxalq yarışlarda idmançılarımızın yüksək
nailiyyətlər qazanmasının dövlətin onlara göstərdiyi diqqət və qayğının
bəhrəsi olduğunu vurğulamışdır.
“Çoxşaxəli iqtisadiyyatda məhsuldar
aqrobiznes” mövzusunda məruzə ilə çıxış edən Prezident
Administrasiyasının aqrar siyasət məsələləri şöbəsinin müdiri Azər
ƏMİRASLANOV milli iqtisadiyyatın formalaşdırılması və dünya
iqtisadiyyatına sürətli inteqrasiyasından, eləcə də Azərbaycan
iqtisadiyyatının inkişafında xüsusi yeri olan aqrar sahəyə göstərilən
dövlət dəstəyindən danışmışdır.
Azərbaycanda ərzaq təhlükəsizliyi
riskinin olmadığını vurğulayan A.Əmiraslanov, əksinə, ölkəmizdə geniş
ixrac imkanlarının mövcudluğunu diqqətə çatdırmışdır.
Şöbə müdiri
qeyd etmişdir ki, Azərbaycanda kənd təsərrüfatına dövlət dəstəyinin
istiqamətlərinin çoxşaxəliliyi, istehsalçıların torpaq vergisindən başqa
bütün vergilərdən azad edilməsi, aqrar sığorta haqqının 50 faizinin
dövlət tərəfindən ödənilməsi, güzəştli kreditlərin verilməsi,
subsidiyalaşma siyasəti və aqrolizinqin genişləndirilməsi aqrar sektorun
inkişafının prioritet sahələrdən biri olmasının bariz nümunəsidir.
“Çağırışlara cavab” adlı sonuncu bölmə iclasında “Artımın və ətraf
mühitin mühafizəsinin balanslaşdırılması” mövzusunda məruzə ilə çıxış
edən ekologiya və təbii sərvətlər naziri Hüseynqulu BAĞIROV ötən 20 ildə
ətraf mühitin qorunması istiqamətində görülən işlərdən söz açmışdır.
Nazir bildirmişdir ki, Azərbaycanda son 20 ildə atmosferə atılan karbon
birləşmələrinin həcmi iki dəfə azalmışdır.
BMT-nin İnkişaf
Proqramının MDB və Avropa üzrə Regional Bürosunun baş iqtisadçısı Ben
SLEY “Qloballaşma və rəqabətli iqtisadiyyat şəraitində iş yerlərinin
yaradılması” mövzusunda məruzəsində Azərbaycanda son 20 il ərzində
sürətli və davamlı iqtisadi inkişafın, məşğulluğun artırılması, əmək
məhsuldarlığının yüksəlməsi, sosial təhlükəsizliyin, müavinətlərin
ödənilməsi sayəsində yoxsulluğun azaldılmasını yüksək
qiymətləndirmişdir.
“Turizm – şaxələndirmənin aparıcı qüvvəsidir”
mövzusunda məruzə edən Mədəniyyət və Turizm Nazirliyinin şöbə müdiri
Mahir QƏHRƏMANOV ölkəmizdə son illərdə turizm sahəsinin sürətlə inkişaf
etdiyini vurğulamışdır. “Azərbaycan Respublikasında turizmin inkişafına
dair 2010-2014-cü illər üçün Dövlət Proqramı” ölkəmizdə yüksək iqtisadi,
sosial və ekoloji tələblərə cavab verən müasir turizm müəssisələrinin
yaradılması, bu sahəyə yerli və xarici investorların cəlb edilməsi
turizm sahəsində beynəlxalq əməkdaşlığın genişləndirilməsinə imkan
yaratmışdır.
SAM-ın aparıcı elmi işçisi Vüsal QASIMLI “Azərbaycanın
çoxşaxəli iqtisadiyyatına aparan yollar” mövzusunda məruzəsində
bildirmişdir ki, ölkə iqtisadiyyatının şaxələndirilməsi istiqamətində
həyata keçirilən ardıcıl tədbirlər nəticəsində Azərbaycanda qeyri-neft
sektorunun ÜDM-də payı 2009-cu ildəki 47 faizdən 2015-ci ildə 61,3 faizə
yüksələcəkdir. Diqqətə çatdırılmışdır ki, qravitasiya modelinin
nəticələrinə görə Azərbaycan Dünya Ticarət Təşkilatına qəbul olunduqdan
sonra ixrac həcmini 80 faiz artıracaqdır. Qravitasiya modeli gələcək 10
ildə ÜDM-i iki dəfə artırmaqla bağlı Prezident İlham Əliyevin qarşıya
qoyduğu hədəfi təsdiqləyir.
“Müstəqilliyin 20 illiyi: mütərəqqi,
ədalətli və dinamik dövlət quruculuğuna gedən yolda əldə olunmuş
nailiyyətlər və qarşıya çıxan çətinliklər” mövzusunda beynəlxalq
konfrans “Twitter” şəbəkəsində canlı yayımlanmışdır.