İğdırda Azərbaycanın dövlət müstəqilliyinin bərpasının 20-ci ildönümü münasibətilə tədbir keçirilmişdir (19 oktyabr 2011)
Bakı, 19 oktyabr (AzərTAc). Respublikamızın dövlət müstəqilliyinin
bərpasının 20-ci ildönümü münasibətilə Azərbaycanın Qars vilayətindəki
baş konsulluğunun dəstəyi ilə Türkiyənin İğdır vilayətində tədbir
keçirilmişdir.
İğdırlı jurnalist Sərdar Ünsal AzərTAc-a bildirmişdir
ki, tədbirdə İğdır ictimaiyyətinin nümayəndələri, deputatlar,
ziyalılar, elm və mədəniyyət xadimləri iştirak etmişlər.
Türkiyənin
və Azərbaycanın dövlət himnləri səsləndikdən sonra, ölkəmizin Qarsdakı
baş konsulu Ayxan Süleymanov xalqımızın müstəqillik uğrunda
mübarizəsindən, ümummilli lider Heydər Əliyevin banisi və qurucusu
olduğu müasir müstəqil dövlətimizin əldə etdiyi nailiyyətlərdən,
Prezident İlham Əliyevin rəhbərliyi ilə Azərbaycanın dinamik
inkişafından bəhs etmişdir.
Azərbaycanın beynəlxalq əlaqələrindən
danışan A.Süleymanov ölkəmizin müstəqilliyə yenidən qovuşduqdan sonra
bütün dünya dövlətləri ilə əlaqələrin qurulduğunu qeyd etmişdir. Bu
ölkələrin sırasında Türkiyənin Azərbaycan üçün çox əhəmiyyətli bir yer
tutduğu vurğulanmışdır.
Tədbir iştirakçılarına müstəqilliyin ilk
illərində ölkəmizdə mövcud olan çətin siyasi və iqtisadi vəziyyətdən,
Azərbaycan torpaqlarının 20 faizinin ermənilər tərəfindən işğal
edilməsindən, 1 milyondan çox insanın öz yurdlarından qovulmasından,
erməni vəhşiliklərindən danışılmışdır. Çətin dövrdə Azərbaycan xalqının
təkidi ilə ümummilli lider Heydər Əliyevin hakimiyyətə qayıdışı ilə
ölkədəki acınacaqlı vəziyyətə son qoyulduğu diqqətə çatdırılmışdır.
Bildirilmişdir ki, Azərbaycanın müstəqilliyinə Türkiyə tərəfindən daim
dəstək verilmişdir.
İğdır valisi Amir Çiçək bildirmişdir ki,
Azərbaycan Respublikasının dövlət müstəqilliyinin bərpa edilməsinin
20-ci ildönümünün Türkiyədə qeyd edilməsindən böyük qürur və sevinc
hissi keçirir. A.Çiçək qeyd etmişdir ki, ulu öndər Heydər Əliyevin “Biz
bir millət, iki dövlətik” və Mustafa Kamal Atatürkün “Azərbaycan
xalqının sevinci bizim sevincimiz, kədəri bizim kədərimizdir” kimi
qiymətli fikirləri xalqlarımız arasındakı qırılmaz telləri daha da
möhkəmləndirir.
Mərasim Azərbaycan incəsənət ustalarının və Naxçıvan Dövlət Filarmoniyasının hazırladığı konsert proqramı ilə davam etmişdir.