Azərbaycanın dövlət müstəqilliyinin bərpasının 20-ci ildönümü Ərzurumda möhtəşəm tədbirlə qeyd olunmuşdur (5 dekabr 2011)
Bakı, 5 dekabr (AzərTAc). Avrasiya İqtisadi Əlaqələr Dərnəyinin,
Avrasiya Vətəndaş Cəmiyyəti Əməkdaşlıq Təşkilatının, Ərzurum Əziziyyə
bələdiyyəsinin birgə təşkilatçılığı ilə Ərzurum Atatürk Universitetində
Azərbaycanın dövlət müstəqilliyinin bərpasının 20-ci ildönümü ilə bağlı
“Müstəqilliyinin 20-ci ilində Azərbaycan-Türkiyə münasibətləri”
mövzusunda beynəlxalq konfrans keçirilmişdir.
AzərTAc xəbər verir
ki, “Bir ürəkdə iki can: Türkiyə - Azərbaycan” şüarı ilə keçirilən
konfransda hər iki ölkə parlamentlərinin deputatları, taninmiş
siyasətçilər, elm adamları, siyasi analitiklər, tələbələr, media
mənsubları və digər təbəqələrin təmsilçiləri iştirak etmişlər.
Tədbir hər iki ölkənin azadlığı və müstəqilliyi uğrunda canlarını qurban
vermiş şəhidlərin ruhunun bir dəqiqəlik sükutla yad edilməsi, Türkiyə
və Azərbaycanın dövlət himnlərinin ifası ilə başlanmışdır.
Avrasiya
İqtisadi Əlaqələr Dərnəyinin rəhbəri, “Ekoavrasiya” dərgisinin baş
redaktoru Hikmet Eren tədbiri giriş sözü ilə açaraq Azərbaycanın son
iyirmi ildə əldə etdiyi uğurlardan danışmışdır. Natiq xüsusilə bu
müddətdə Türkiyə ilə Azərbaycan arasında imzalanmış mühüm sazişləri
diqqətə çatdıraraq bu gün iki dövlətin siyasi-iqtisadi və strateji
əlaqələrinin yüksələn xətlə inkişaf etdiyini vurğulamışdır.
Avrasiya
Vətəndaş Cəmiyyəti Əməkdaşlıq Təşkilatı sədrinin müavini Kutluhan
Yazıcıoğlu belə bir tədbirin keçirilməsindən məmnun olduqlarını
bildirərək, bu gün Azərbaycanın bölgədə söz sahibinə çevrilən bir dövlət
səviyyəsinə yüksəldiyini bildirmişdir.
Əziziyyə bələdiyyəsinin
sədri Fateh Cengez ötən əsrin əvvəllərində Ərzurumun müdafiəsində
azərbaycanlıların böyük rolunu vurğulayaraq, Azərbaycan ərazilərinin 20
faizinin erməni işğal altında olduğunu və bu torpaqların gec-tez azad
ediləcəyini söyləmişdir.
Türkiyə Böyük Millət Məclisinin (TBMM)
deputatı, doktor Necdet Ünüvar ölkəsinin istiqlal savaşında qələbəsində
Azərbaycanın maddi və mənəvi rolunun əhəmiyyətini xüsusi xatırlatmışdır.
Necdet Ünüvar bu yaxınlarda Vanda baş vermiş dəhşətli zəlzələdən sonra
Türkiyəyə yardım edən ilk ölkənin dost və qardaş Azərbaycan olduğunu
diqqətə çatdırmışdır. O, 3 təyyarə dolu heyəti ilə zəlzələnin
nəticələrinin aradan qaldırılmasına kömək göstərən Azərbaycana təşəkkür
etmişdir.
Ərzurum Texniki Universitetinin rektoru, professor Muammer
Yaylalı Ərzurumda Azərbaycanın müstəqilliyinin bərpasının 20 illiyinin
qeyd olunmasından qürur duyduğunu bildirərək bizim elə bir
qardaşlığımız, elə bir bağlılığımız vardır ki, dünya durduqca davam
edəcəkdir demişdir.
Qara Dəniz Ölkələri Parlament Assambleyasının
sədri, TBMM-in deputatı İsmayil Safi Azərbaycanın beynəlxalq arenada söz
sahibinə çevrildiyini diqqətə çatdıraraq ölkələrimizin beynəlxalq
təşkilatlarda daim bir-birlərinə dəstək verdiklərini söyləmişdir.
TBMM-in
deputatı Feramez Üstün Azərbaycanın müstəqilliyinin 20-ci ildönümünün
Türkiyədə qeyd edilməsindən çox xoşbəxt olduğunu söyləmişdir. Demişdir
ki, hələ 1990-cı il yanvarın 20-də universitetdə tələbə olarkən sovet
ordusunun Azərbaycanda törətdiyi faciəyə qarşı etiraz aksiyaları
keçirdiklərini bildirmişdir.
Azərbaycanın Qarsdakı baş konsulu Ayxan
Süleymanov çıxışında iki qardaş ölkə arasında münasibətlərin bugünkü
səviyyəyə çatmasında ümummilli lider Heydər Əliyevin böyük rolunu xüsusi
vurğulayaraq bundan sonra əlaqələrin daha da inkişaf edəcəyinə əmin
olduğunu bildirmişdir.
TBMM-in Ərzurumdan seçilmiş deputatı
Muhyettin Axsaq isə bu bölgənin Türkiyə-Azərbaycan münasibətlərindəki
yeri və rolu barədə fikirlərini bölüşmüşdür.
Milli Məclisin deputatı
Qənirə Paşayeva Azərbaycanın öz əzəli torpağı olan Dağlıq Qarabağın
erməni işğalı altında qalmasını heç vaxt qəbul etməyəcəyini
bildirmişdir. Deputatın “Ermənistan o torpaqları işğal etsə də, heç bir
zaman Azərbaycanın bu əzəli və əbədi ərazisinə sahib ola bilməyəcək”
sözləri tədbir iştirakçıları tərəfindən alqışlarla qarşılanmışdır.
Milli Məclisin Türkiyə-Azərbaycan dostluq qrupunun rəhbəri, professor
Nizami Cəfərov da qardaş ölkələrimiz arasında sosial-iqtisadi, mədəni və
siyasi əlaqələrin bundan sonra da yüksələn xətt üzrə davam edəcəyinə
əminliyini söyləmişdir.
Türkiyə-Qazaxıstan parlament dostluq
qrupunun rəhbəri, TBMM-in deputatı Haluk İpək isə Qarabağın işğalına son
qoyulmayanadək Türkiyə-Ermənistan sərhədlərinin açılmayacağını
bildirmişdir.
Sonda hər iki ölkənin ictimai-mədəni əlaqələrinin
inkişafında xidmətlərinə görə TBMM-in deputatları, ziyalılar Dünya Gənc
Türk Yazarlar Birliyinin təsis etdiyi “Bəxtiyar Vahabzadə” mükafatına;
azərbaycanlı deputatlar Qənirə Paşayeva və Nizami Cəfərov isə Avrasiya
İqtisadi Əlaqələr Dərnəyinin “Türk dünyasına xidmət” mükafatına layiq
görülmüşlər.
Konfrans öz işini bölmələr üzrə davam etdirmişdir.
Bölmə iclaslarında Azərbaycan və Türkiyədən olan elm adamları, QHT
rəhbərləri məruzələrlə çıxış etmişlər.
Dekabrın 3-də isə Ərzurumda
Dünya Gənc Türk Yazarlar Birliyi və Əziziyyə bələdiyyəsi tərəfindən
təşkil olunmuş Azərbaycan şairləri və ozanlar gecəsi böyük
müvəffəqiyyətlə keçmişdir.